لە رۆژی جیهانیی کرێکاران و زەحمەتکێشاندا ٢٨ ێکخراو لە سلێمانی چالاکییەکیان ئەنجامدا و چەند داواکارییەکیان لە سەر دۆخی کرێکاران ئاڕاستەی حکومەت کرد و داوای دابینکردنی بیمە و قەرەبووکردنەوەی مووچەی فەوتاوی کرێکارانیان کرد.
بە بۆنەی ڕۆژی جیهانی کرێکارانەوە ئەمڕۆ کۆبەندی ڕێکخراوەکان، کە لە ٢٨ ڕێکخراوی کرێکاریی و کۆمەڵگەی مەدەنیی پێکهاتوون لە پارکی نالی لە شاری سلێمانی کۆنگرەیەکی ڕۆژنامەنووسییان ئەنجامدا.
لە کۆنگرەکەدا حەمە هەژار سەرۆکی سەندیکای کرێکارانی بیانی ڕاگەیەندراوی ئەو کۆبەندەی خوێندەوە و چەند داواکارییەکیان ئاڕاستەی حکومەت کرد. داواکارییەکان بریتین لە:
ـ دەبێت حکومەت مووچەی کرێکاران دوانەخات و لە کاتی خۆیدا بۆیان دابین بکات.
ـ پێویستە حکومەت و کۆمپانیاکان و کەرتی تایبەت قەرەبووی مووچەی فەوتاوی کرێکاران بکەنەوە.
ـ پێویستە حکومەت هەموو خزمەتگوزارییەکانی تەندروستی و خۆپاراستن لە نەخۆشی بۆ کرێکاران دابین بکات.
ـ یاسای کار کارا بکرێت و چاودێریی دۆخی کرێکار بکرێت.
ـ مووچە پاشکەوتەکان یان بە پسوڵە یان لە ڕێگای بانکەوە بگەڕێندرێتەوە بۆ کرێکار.
ـ دەبێت حکومەت بیمەی کار بۆ کەسانی بێکار بە ژن و پیاوی سەروو ۱۸ساڵەوە دابین بکات.
ـ حکومەت پێویستە لە باج و پارەی ئاو و کارەبای هاوڵاتیان خۆش بێت، خاوەن موڵکەکانیش لە کرێی دوکان و خانووەکان خۆش بن.
- دەبێت سەرمایەدارانی کەرتی تایبەت بە پێی یاسا پابەند بن بە پاراستنی مافی کرێکارانەوە.
ژ.ت
